foridpsandpdf

ထူးဆန်းသည့်ဓလေ့ (An Awkward Ritual) 

လူမျိုးတစ်မျိုးရဲ့ ရှေးအယူအဆတွေက အော်ဂလီဆန်လောက်တဲ့အထိ ထူးဆန်းအံ့ဩစရာကောင်းတတ်တာကို ကျွန်တော်တို့ ဇာတ်ကားတွေထဲမှာ ကြုံတွေ့ဖူးကြပါတယ်။ ယဇ်ပူဇော်တာတို့၊ မိန်းကလေးရဲ့ ရာသီသွေးကို ရေထဲထည့်သောက်တာတို့ စသဖြင့်ပေါ့။ ကျွန်တော်တို့ ကရင်နီပြည်က လူမျိုးတွေမှာလည်း ထူးဆန်းတဲ့ ဓလေ့တွေရှိပါတယ်။ ဥပမာအားဖြင့် အီဒက်ချိတ်ထားရင် မကောင်းဆိုးဝါးတွေ မလာဘူးဆိုတာလိုမျိုးပေါ့။ (အီဒတ်အကြောင်း ရေးထားတဲ့ စာကို ဝက်ဆိုက်တွင် ဖတ်ရှုနိုင်ပါသည်။) နောက်ထပ် ထူးဆန်းတာဆိုရင် တချို့ရွာတွေမှာ ကျွန်တော်တို့က သွားရင်းလာရင်း ကြက်တစ်ကောင်ကို ကား သို့မဟုတ် အခြားယာဉ်တစ်ခုခုနဲ့ တိုက်မိလို့ ကြက်သေဆုံးသွားခဲ့ရင် အဲ့ဒီကြက်ရဲ့ ဆွေ ၇ ဆက်၊ မျိုး ၇ ဆက် လျော်ပေးရတဲ့ ဓလေ့လည်းရှိပြန်တယ်။ ထူးဆန်းပေစွ။ 

​ဒါတွေထက်ပိုဆိုးတဲ့ ကျွန်တော်ကြားဖူးသမျှ ကရင်နီပြည်က ဓလေ့တွေထဲမှာ အထူးဆန်းဆုံးကတော့ "ရွာဆေးရတဲ့ ဓလေ့" ဖြစ်ပါတယ်။ ဒီဓလေ့က ဘယ်လိုမျိုးလဲဆိုရင် သမီးရည်းစားနှစ်ယောက်၊ လက်မထပ်သေးဘဲ အတူနေကြတယ် ဆိုပါတော့ဗျာ။ မှားယွင်းပြီးဖြစ်စေ၊ နှစ်ဦးသဘောတူဖြစ်စေ အတူနေပြီးသွားရင် နေပြီးသွားကြောင်း လူကြီးတွေကို ပြောပြရတယ်။ အဲ့ဒီအခါ အတူနေခဲ့တဲ့ စုံတွဲရဲ့ မိသားစု၊ ဆွေမျိုးတွေ အဆိုးတရားတွေနဲ့ မကြုံကြိုက်ရလေအောင် ရွာဆေးရပါတယ်။ ကြက်ဖိုကြက်မတစ်စုံကို သတ်စားခြင်း၊ သို့မဟုတ် ကလေးမွေးဖူးတဲ့ ဝက်မတစ်ကောင်ကို သတ်ခြင်းဖြင့် ဆေးလေ့ရှိကြပါတယ်။ အဲ့ဒီလို ကြက်ဖိုကြက်မ သို့မဟုတ် ဝက်နဲ့ဆေးတဲ့အခါ ကျူးလွန်ထားတဲ့သူက အဲ့ဒီအသားကို စားလို့မရပါဘူး။ 

ဘယ်လောက်တောင် ကသိကအောင့်ဖြစ်စေတဲ့ ဓလေ့ကြီးပါလဲ။ သေချာတာကတော့ ကိုယ့်ချစ်သူနဲ့ မထင်မှတ်ဘဲ ဖြစ်သွားရင်တောင် လူသိရှင်ကြားပွဲလုပ်ပြီး "ဆေး" ဖို့မပြောနဲ့ အိမ်က လူကြီးတွေကိုတောင် မပြောချင်ဘူးလေ​။ ကရင်နီက ဓလေ့ကတော့ လူကြီးတွေသိအောင်ပြောပြရရုံတင်မက လူသိရှင်ကြား "ဆေးကြောပွဲ"ကြီး လုပ်ရသေးတာဗျ။ မထူးဆန်းပေဘူးလား။ မလုပ်ရင်လည်း ကိုယ်တင်မက မိသားစုပါ ခိုက်မယ်ဆိုတော့ လုပ်ကြတာပါပဲ။